Перизат Қайраттың туыстарының Дубайдағы пәтерлері: ҚМА ақпаратты жоққа шығарды
Фото: Instagram
Әлеуметтік желіде сотталған Перизат Қайраттың туыстары Дубайдағы бірнеше пәтерді қайырымдылыққа жиналған қаражат есебінен сатып алғаны туралы ақпарат тарады. Қаржылық мониторинг агенттігі бұл болжамның расталмағанын мәлімдеді, деп хабарлайды NoFake.kz.
«Бұған дейін Қаржылық мониторинг агенттігі аталған адамдардың жылжымайтын мүлікті П. Қайраттың қылмыстық жолмен тапқан ақшасына сатып алуы мүмкін деген болжамды тексерген. Алайда бұл болжам расталмады», – делінген агенттік хабарламасында.
ҚМА мәліметінше, тергеу барысында барлық қаржылық операциялар тексеріліп, жымқырылған қаражаттың қайда жұмсалғаны анықталған. Перизат Қайрат қайырымдылыққа жиналған ақшаны автокөліктер мен пәтерлер сатып алуға, жылжымайтын мүлікті жөндеуге, қымбат киімдер мен әшекей бұйымдарына, сондай-ақ шетелдік сапарлар мен ойын-сауыққа жұмсаған.
Алайда агенттік жарияланымда аталған туыстарымен қандай да бір қаржылық есеп айырысу жүргізілгенін анықтамаған.
«Дубайдағы пәтерлер 2011–2019 жылдары, яғни «Biz Birgemiz Qazaqstan 2030» қоры құрылғанға және Перизат Қайрат қылмыстық әрекетке кіріскенге дейін сатып алынған», – делінген хабарламада.
ҚМА дерегінше, аталған ерлі-зайыптылар 20 жылдан астам уақыт бойы жылжымайтын мүлік сатып алу және қайта сатумен айналысады. Олар Перизат Қайрат пен оның анасынан бөлек тұрып, кәсіпкерлік қызметін дербес жүргізген.
Агенттік Қылмыстық-процестік кодекстің 161-бабына сәйкес, мүлікті бұғаттау немесе тәркілеу үшін оның қылмыстық жолмен алынғанын растайтын дәлелдер қажет екенін түсіндірді.
Осылайша, ҚМА тексеруі Перизат Қайраттың туыстары Дубайдағы пәтерлерді қайырымдылыққа жиналған қаражатқа сатып алған деген болжамды растаған жоқ. Агенттік туыстық байланыстың өзі қылмыстық жауапкершілікке тартуға немесе мүлікті тәркілеуге негіз болмайтынын атап өтті.
