Әлем көшбасшыларының смартфон камераларын скотчпен жауып жүргені рас па
Фото: Leadstories
Әлеуметтік желіде әлем көшбасшылары смартфондарының камерасын скотчпен жауып жүргені туралы сурет тарады. Фактчекерлер оның ЖИ көмегімен жасалғанын анықтады, деп хабарлайды NoFake.kz.
X әлеуметтік желісінде әлем көшбасшылары смартфондарының камерасын скотчпен жауып тұрғандай бейнеленген коллаж таралып жатыр. Жазба авторлары саясаткерлердің неден қорғануға тырысатынын және қарапайым қолданушылар да осылай істеуі керек пе деген сұрақ көтерген. Алайда суретте жасанды интеллект арқылы генерацияланған контентке тән белгілер бар, деп хабарлайды NoFake.kz Lead Stories басылымына сілтеме жасап.
Жазба 2026 жылғы 11 қарашада X желісіндегі @defense_civil25 аккаунтында пайда болған. Оның авторы Grok чат-ботынан неге әлем көшбасшылары телефондарының камерасын жауып жүретіні жайлы сұраған.
«Неліктен әлем көшбасшылары телефондарының камерасын скотчпен жауып жүреді? Олар нақты неден қорғануға тырысады? Мен де солай істеуім керек пе?», — деп жазған ол.
Коллажда алты саясаткер бейнеленген: Ресей президенті Владимир Путин, АҚШ президенті Дональд Трамп, Қытай Халық Республикасының төрағасы Си Цзиньпин, Франция президенті Эмманюэль Макрон, Израиль премьер-министрі Биньямин Нетаньяху және Түркия президенті Режеп Тайип Ердоған.
Фактчекерлер нені анықтады?
Lead Stories мамандары суреттегі күмәнді детальға назар аударған. Алты саясаткердің де смартфон камералары бір-біріне өте ұқсас скотч жолақтарымен жабылған. Бұл табиғи емес көрінеді.
Журналистер суретті тексеру үшін жасанды интеллект көмегімен жасалған контентті анықтауға арналған үш онлайн құралды пайдаланған.
Hive Moderation сервисі коллаждың ЖИ көмегімен жасалған болу ықтималдығын 98,5% деп бағалаған. Ал Sightengine құралы бұл көрсеткішті 97% деп анықтаған.
Бұл нәтижелер суреттің жасанды интеллект арқылы жасалған болуы ықтимал екенін көрсетеді. Дегенмен автоматтандырылған анықтау құралдарының бағасы өздігінен түпкілікті дәлел бола алмайды.
Әлеуметтік желіде тараған коллаж әлем көшбасшыларының смартфон камераларын шынымен скотчпен жауып жүретінін дәлелдемейді. Lead Stories тексеруіне сәйкес, суретте жасанды интеллект көмегімен жасалған контенттің белгілері анықталған.
