«23 млн теңге шығын келтірген»: Астанада қаржы пирамидасының басшысы сотталды
Фото: pixabay.com
Астанада қаржы пирамидасын басқарған азамат 5 жылға сотталды. Ол жәбірленушілерге 23 млн теңге көлемінде залал келтірген, деп хабарлайды Nofake.kz.
Астана қаласының қылмыстық істер жөніндегі ауданаралық соты «WorldBusiness Consulting» қаржы пирамидасының құрылымдық бөлімшесін басқарған М.-ға қатысты сот үкімін шығарды. Ол қаржы пирамидасын құрып, оған басшылық жасағаны үшін Қылмыстық кодекстің 217-бабы 3-бөлігінің 2-тармағы бойынша кінәлі деп танылды.
«Сот анықтағандай, 2020 жылдың тамыз-қыркүйек айларында М. алтыншы деңгейлі директор ретінде қаржы пирамидасына ақша қаражатын тартқан. Оның әрекетінен екі жәбірленушіге жалпы шамамен 23 млн теңге көлемінде залал келтірілген. Оның ішінде Б.-ға шамамен 8 млн, ал Р.-ға 15 млн теңге шығын келген», — делінген ведомство хабарламасында.
Сотталушы кінәсін ішінара мойындаса, қорғау тарапы оның әрекетінде қылмыстық құқық бұзушылық құрамы жоқ екенін айтып, ақтауды сұраған. Алайда прокурор сотта М.-ның кінәсін дәлелдеген.
«Сот залалды ішінара өтеуді жеңілдететін мән-жайды ескеріп, ауырлататын мән-жайларды анықтамаған. Нәтижесінде М.-ға қылмыстық-атқару жүйесінің ең төменгі қауіпсіздік мекемесінде өтеу арқылы 5 жыл бас бостандығынан айыру жазасы тағайындалды», — делінген хабарламада.
Сонымен қатар, ведомство оған азаматтардың ақша қаражаты мен инвестицияларын тартуға байланысты қызметпен айналысуға 5 жылға тыйым салынғанын хабарлады. Сот үкімі әзірге заңды күшіне енген жоқ.
Айта кетейік, бұған ҚР Бас прокуратурасы 100 млн теңге несие алып беруді уәде еткен алаяқтық схемасын әшкерелеген еді.
