«Тез сатыңыз»: Алаяқтар пәтерді сатуға қалай мәжбүрлейді
Фото: ІІМ баспасөз қызметі
Көкшетау полициясы нотариустарға жылжымайтын мүлікке қатысты алаяқтықтың жаңа схемалары туралы ескертті, деп хабарлайды Nofake.kz.
Көкшетауда полиция қызметкерлері нотариустармен жұмыс кездесуін өткізу барысында мамандарға жылжымайтын мүлікті заңсыз иеліктен шығаруға және азаматтардың дербес деректерін пайдалануға байланысты интернет-алаяқтықтың кең таралған схемалары туралы ескертті.
Ақмола облысы Нотариаттық палатасының төрағасы Гүлжан Кубитаеваның қатысуымен, Көкшетау қаласының Полиция басқармасында өткен кездесуде киберқылмысқа қарсы іс-қимыл мәселелері талқыланды.
«Полицейлер пәтерлер мен басқа да жылжымайтын мүліктерді сатып алу-сату мәмілелерін ресімдеу кезіндегі тәуекелдерге ерекше назар аударды. Әлеуметтік инженерия әдістерін қолдана отырып, алаяқтар өздерін банктердің, полицияның немесе мемлекеттік органдардың қызметкерлері етіп таныстырып, әртүрлі сылтаулармен азаматтарды мүлікті шұғыл сатуға немесе оны үшінші тұлғаларға ресімдеуге көндіреді», — делінген хабарламада.
Осы ретте, нотариустарға, егер азамат айқын психологиялық ықпалда болса, асығыс әрекет етсе немесе банктердің не Мемлекеттік мекемелердің қызметкерлері ұсынған белгісіз тұлғалардан телефон қоңыраулары туралы хабарласа, мәмілелер жасау мән-жайларына аса назар аудару қажеттігі туралы ескертілді.
Полицейлер сондай-ақ үшінші тұлғаларға дербес деректерді, SMS-хабарламалардан кодтарды, банк карталарының деректемелерін және басқа да құпия ақпаратты беруге жол берілмейтінін еске салды. Ал, нотариустарға алаяқтықтың алдын алу бойынша ұсыныстары бар ақпараттық жадынамалар таратылды.
Еске сала кетейік, Ақмола облысының Полиция департаменті азаматтарды белгісіз адамдар тарапынан қысымға берілмеуге, келіп түскен ақпаратты ресми дереккөздер арқылы қайта тексеруге және күдік туындаған кезде 102 нөмірі бойынша дереу полицияға жүгінуге шақырады.
