Қазақстанда сатушыларға шағым жолдайтын QR-кодтар пайда болады

Қазақстан сауда орындарында шағымды нақты бизнес иесіне тікелей жолдайтын QR-кодтар енгізіліп жатыр. Бұл туралы Тұтынушылардың құқықтарын қорғау комитеті төрағасы Болат Танабергенов мәлімдеді, деп хабарлайды NoFake.kz.

Ведомство басшысының айтуынша, технологиялық кері байланыс бойынша пилоттық жоба отандық сауда базарларында басталып жатыр. Жаңа QR-кодтар тікелей сауда орындарда орналастырылады. Олардың көмегімен сатып алушылар заңбузушылықтар туралы салық органдарына да, сауда нүктесінің басшылығына да жедел хабарлай алады.

«Әрбір сатушының сауда орнында, тауарды өткізу нүктесінде QR-код болуы тиіс. Егер, айталық, чек бойынша сұрақтар туындаса, тұтынушы телефон камерасын QR-кодқа бағыттап, шағымын бірден жолдай алады. Егер бұл салыққа немесе чекке қатысты мәселе болса, шағым тиісті аумақтық мемлекеттік кірістер департаментіне жіберіледі», — деп түсіндірді Болат Танабергенов.

Жобаның бірегейлігі – бұл цифрлық шешім жалдамалы қызметкерлердің шиеленісті жағдайларды басшылықтан жасыру әрекеттеріне жол бермейді, өйткені жүйеге меншік иесімен тікелей байланыс функциясы қосылмақ.

«Сонымен қатар, осы QR-код арқылы тұтынушының сатушыға (бизнес иесіне) тікелей шағыммен жүгіну мүмкіндігін енгізуді жоспарлап отырмыз және қазірдің өзінде енгізіп жатырмыз. Бұл жүйе іске қосылған кезде біз оның таныстырылымын өткіземіз. Біздің бутиктерде негізінен жалдамалы сатушылар тұрады, ал бұл жерде QR-код арқылы шағымды тікелей сол бутиктің қожайынына, тауарды сату кезінде қандай бұзушылықтар болып жатқанынан бейхабар болуы мүмкін иесіне жолдауға болады», — дейді комитет төрағасы.

Профильді комитет жүйе іс жүзінде толыққанды жұмыс істей бастағаннан кейін жобаның ресми таныстырылымын өткізуді жоспарлап отыр.

Шағымдарды елемегені үшін ескертудің орнына айыппұл салынады

Бақылауды цифрландырумен қатар, Қазақстанда кәсіпкерлердің әкімшілік жауапкершілігі де күшейтілді. Енді азаматтардың заңды талап-тілектерін қараудан бас тартқаны үшін бизнес өкілдеріне нақты айыппұл төлеуге тура келеді. Бұл шара дауларды сотқа дейін реттеуді ынталандыруға бағытталған.

«Осы орайда айта кететін жайт, өткен жылы біз, біріншіден, Әкімшілік құқық бұзушылық туралы кодекске өзгерістер енгіздік. Егер бұрын, айталық, бизнес субъектісі шағымға жауап бермесе, оған қолданылатын алғашқы жаза ескерту болатын. Бүгінгі таңда біз оны айыппұлға өзгерттік», — деп атап өтті Болат Танабергенов.

Енді сатушы тұтынушылардың сауалына жауап беру-бермеу туралы ойланатындығын айтты ведомство басшысы.