Жалған сәлемдеме: Бас прокуратура алаяқтықтың жаңа схемасы туралы ескертті
www.magnific.com
Қазақстанда алаяқтар «Қазпошта» атынан жалған хабарламалар таратып, азаматтардың жеке деректерін ұрлауға әрекеттеніп жатыр. Бас прокуратура сәлемдеме жеткізу туралы күмәнді хабарламалардағы сілтемелерге өтпеуге шақырды.
Ведомствоның мәліметінше, 2026 жылғы 9 қарашадан бастап қазақстандықтарға шетелдік нөмірлерден пошта жөнелтілімдерінің жеткізілетіні туралы хабарламалар келе бастаған. Атап айтқанда, осындай хабарламалардың бірі +212 6 12 82 15 27 нөмірінен жіберілген. Алайда алаяқтар өзге нөмірлерді де пайдалануы мүмкін.
Алаяқтық схема қалай жұмыс істейді?
Алаяқтар өздерін «Қазпошта» қызметкерлері ретінде таныстырып, сәлемдемені жеткізу үшін мекенжайды нақтылау қажет екенін хабарлайды. Ол үшін азаматтарға арнайы сілтемеге өтіп, жетіспейтін мәліметтерді толтыру ұсынылады. Хабарламаның сенімді көрінуі үшін олар сілтемеге өту тәртібін түсіндіретін қосымша нұсқаулық та жібереді. Алайда сілтеме пошта қызметінің ресми сайтына ұқсатып жасалған жалған интернет-ресурсқа апарады. Мұндай фишингтік сайттар арқылы алаяқтар азаматтардың тұрғылықты мекенжайын және басқа да құпия деректерін жинауға тырысады.
Неліктен қазақ тіліндегі хабарламаларға ерекше назар аударылды?
Бас прокуратура алаяқтардың хабарламаларды мемлекеттік тілде және ресми-іскерлік стильде таратып жатқанын атап өтті. Бұл азаматтардың сеніміне кірудің қосымша тәсілі болуы мүмкін.
«Алаяқтық хабарламалардың мемлекеттік тілде жіберілуі ерекше қауіп төндіреді, өйткені оны пайдалану сенім тудырады және алушының қырағылығын төмендетеді. Хабарламалар ресми-іскерлік стильді, пошта қызметінің хабарламаларына тән тұжырымдар мен атрибуттарды қолдана отырып ресімделеді», – делінген Бас прокуратураның хабарламасында.
Ведомство мәліметінше, осындай тәсілдер хабарламаның шынайы екеніне сендіріп, азаматтардың зиянды сілтемелерге өту ықтималдығын арттырады.
Өзіңізді қалай қорғауға болады?
Бас прокуратура азаматтарға белгісіз нөмірлерден келген сілтемелерді ашпауға, күмәнді сайттарға жеке және банктік деректерін енгізбеуге кеңес береді. Сәлемдеменің жеткізілуі туралы ақпаратты тек пошта қызметінің ресми сайты немесе қосымшасы арқылы тексерген жөн.
«Сәлемдеме туралы зиянсыз көрінетін хабарламаның артында алдау жолымен сіздің дербес деректеріңізді иемдену және ақшалай қаражатыңызды ұрлау әрекеті жасырынуы мүмкін», – деп ескертеді Бас прокуратура.
Демек, қазақ тілінде жазылған немесе «Қазпошта» атауы көрсетілген хабарлама оның ресми екеніне кепілдік бермейді. Сәлемдеме күтіп отырған азаматтар да жеткізу мекенжайын нақтылау туралы кез келген сұрауды алдымен ресми арналар арқылы тексеруі қажет.
