Елизавета патшайым құпия белгілер қолданған ба
Фото: marieclaire.ru
Букингем сарайында ондаған жыл бойы көзге көрінбейтін «құпия тіл» қолданылғаны туралы ақпарат бұрыннан айтылып келеді. NoFake.kz тілшісі бұл мәліметтің қаншалықты рас екенін тексеріп көрді.
British Heritage Travel басылымының жазуынша, марқұм Елизавета II өз қызметкерлерімен бейресми түрде арнайы ишаралар арқылы байланыс орнатқан. Бұл туралы корольдік отбасының тарихшысы әрі биографы Хью Викерс айтқан.
«Құпия белгілер сөздігі»
Корольдік отбасының биографының сөзінше, егер патшайым сөмкесін бір қолынан екінші қолына ауыстырса, бұл оның ағымдағы әңгімені аяқтауға дайын екенін білдіретін. Сонымен қатар, егер хабардар адамдар Патшайымның сөмкесін үстелдің үстіне қойғанын көрсе, олар Мәртебелі иесінің бес минуттан кейін іс-шарадан кетуге дайын екенін түсінетін.
Алайда, ең маңызды белгі саусақтағы неке жүзігімен байланысты болған көрінеді.
Егер Патшайым неке жүзігін айналдыра бастаса, бұл шұғыл шаралар қолдануды талап ететін! Жүзіктің бұралуы оның әңгімені дереу тоқтатқысы келетінін білдірген.
Корольдік отбасының басқа мүшелерінде мұндай құпия бар ма?
Көпшілікті қызықтыратын сұрақ: Корольдік отбасының басқа мүшелері де осындай шифрланған қимылдарды қолдана ма?
Басылымның мәліметінше, отбасының өзге мүшелері Патшайым сияқты күрделі ишаралар жүйесін пайдаланбайды. Дегенмен, Кейт Миддлтонның өзіндік әдісі бар екені айтылады. Ол қонақтармен немесе жанкүйерлермен «ыңғайсыз қол алысудан» қашу үшін сөмкесін алдына екі қолымен ұстап жүруді жөн көреді. Айта кетейік, биыл 21 сәуірде Патшайымның туғанына жүз жыл толды.
