ТЖМ Ақмола облысындағы өрт бөлімшелеріне қатысты жағдайды түсіндірді
Фото: пресс-служба МЧС РК
Ақмола облысында өрт сөндіру бөлімдерінің кадрлары қайта бөлінуде. Екі бөлімшенің құтқарушылары әрекет ету күштерін күшейту үшін астана маңындағы ТЖД бөлімдеріне жіберіліп жатыр, деп хабарлайды nofake.kz/.
Әлеуметтік желілерде Бурабай ауданында бірден төрт өрт сөндіру бөлімі жабылады деген бейнеүндеу тарады. Видеода өртке қарсы қызмет қызметкерлерінің жұбайлары — Мемлекет басшысынан Щучинск қаласындағы №5 және Бурабай кентіндегі №20 өрт сөндіру бөлімдерін жабуға жол бермеуді сұрайды.
Төтенше жағдайлар министрлігінің баспасөз қызметі видеода айтылғандай төрт емес, Бурабай ауданындағы екі өрт сөндіру бөлімінің қызметкерлерін ауыстырылатынын мәлімдеді. Айтуларынша, құтқарушылар Ақмола облысы ТЖД-ның астана маңындағы бөлімшелеріне жіберіліп жатыр. Бұл ретте жеке құрам ұйымдастырушылық-штаттық өзгерістер туралы алдын ала хабардар етіліп, жаңа бөлімшелерде қызметін жалғастыруға дайын екендерін білдірген.
«Ұйымдастырушылық-штаттық іс-шаралар аясында Бурабай ауданындағы екі өрт сөндіру бөлімінің (ӨСБ-5 және ӨСБ-20) штаттық бірліктері Ақмола облысы ТЖД құрамына кіретін астана маңындағы өрт сөндіру бөлімшелеріне қайта бөлінді. Бұл шешім астана маңындағы аудандарда халық санының өсуіне байланысты қабылданды және құтқару бөлімшелерінің материалдық-техникалық базасы мен кадрлық қамтамасыз етілуін күшейтуді талап етеді. Қазіргі таңда қысқартуға түскен қызметкерлер жақын маңдағы өрт сөндіру бөлімшелеріне жұмысқа орналастырылады, бұл олардың тәжірибесін сақтауға және әлеуметтік кепілдіктерді қамтамасыз етуге мүмкіндік береді», — деп хабарлады ТЖМ.
Ведомство сондай-ақ Бурабай ауданында өрт сөндіру бөлімшелеріне түсетін жүктеме астана маңындағы гарнизонмен салыстырғанда төмен екенін атап өтті. Мұны шақыртулар статистикасы да растайды: өткен жылы ӨСБ-5 және ӨСБ-20 бөлімшелері өрттерге барлығы 27 рет шыққан. Осыған байланысты жедел ресурстарды бөлу мәселесін қайта қарау қажеттілігі туындады. Сонымен қатар өрт сөндіру бөлімдері ғимараттарының жай-күйі де ескерілді: олар 1956 және 1961 жылдары пайдалануға берілген. Бүгінде екі ғимарат та апатты деп танылып, жеке құрам үшін қауіпті болуы мүмкін.
Қазіргі уақытта Щучинск-Бурабай курорттық аймағының бүкіл аумағындағы өрт қауіпсіздігін жуырда салынған, толық жабдықталған үш мамандандырылған өрт сөндіру бөлімі қамтамасыз етіп отыр.
