Референдум геосаяси жағдайда: 10 елде сайлау учаскелері жұмыс істемейді

Геосаяси жағдайға байланысты шетелдегі 10 елде референдум кезінде сайлау учаскелері жұмыс істемейді. Бұл туралы Республикалық референдум комиссиясының үшінші отырысында мәлім болды, деп хабарлайды NoFake.kz.

Учаскелер саны мен қауіпсіздік мәселесі

ОРК төрағасы Нұрлан Әбдіров ел аумағындағы және шетелдегі учаскелердің дайындығына тоқталды. Оның айтуынша, еліміздегі сайлау учаскелерінің саны 10 402-ні құрап отыр.

«Қазіргі таңда Таяу Шығыста саяси-әскери жағдайдың ушығуына, сонымен қатар бірқатар елдердегі қауіпсіздіктің төмен деңгейіне байланысты 10 елдегі 11 сайлау учаскесінің жұмысын тоқтату туралы шешім қабылданды. Референдум кезінде 54 елде орналасқан ҚР шет елдердегі өкілдіктері жанынан 71 учаске жұмыс істейтін болады», — деді Ерлан Әлімбаев.

Министрлік өкілінің мәліметінше, шетелде дауыс беруші қазақстандықтардың саны 14 230 адамды құрайды. Қажетті құжаттар мен бюллетеньдер дипломатиялық курьерлер арқылы жақын арада жолданады.

Халықаралық байқаушылар мен аккредиттеу

Биылғы референдумды бақылауға әлемдік қоғамдастық тарапынан қызығушылық жоғары. Аккредиттеу процесінің аяқталуы туралы Мұхтар Ерман хабарлады. Оның айтуынша, референдумға барлығы 359 халықаралық байқаушы қатысады. Олардың ішінде 38 мемлекет пен 11 халықаралық ұйымның (ЕҚЫҰ, ТМД және т.б.) өкілдері бар.

«Бақылау барысына 15 мемлекеттің орталық сайлау органдарының өкілдері қатысады. Оның ішінде Әзербайжан, Албания, Армения, Қырғызстан, Ресей, Өзбекстан, Тәжікстан мен Түркияның сайлау комиссияларының төрағалары бар. Біз бұл тығыз ынтымақтастықты жоғары бағалаймыз», — деді Қазақстан Республикасы Орталық сайлау комиссиясының Төрағасы Нұрлан Әбдіров .

Референдум барысын тек халықаралық байқаушылар ғана емес, сонымен қатар әлемдік БАҚ өкілдері де бақылайды. Қазіргі таңда 31 елден 68 шетелдік басылымның 185 тілшісі аккредитацияға өтінім жіберген.