ІІМ түнде «сағатына 66 км жылдамдық» болады деген ақпаратты жоққа шығарды
Коллаж: nofake.kz/
Әлеуметтік желіде түнгі сағат 00:00-ден кейін рұқсат етілген жылдамдық 66 км/сағ болатыны туралы ақпарат тарады. ІІМ аталған ақпаратты жоққа шығарды, деп хабарлайды nofake.kz/ порталы.
Азаматтар түнгі сағат 00:00-ден кейін рұқсат етілген жылдамдық 66 км/сағ болатыны туралы ақпаратты естіп, дабыл қағып жатыр. Желіде тіпті осы жылдамдықты сақтамаған жағдайда 19 000 теңге көлемінде айыппұл салынады деген хабарлама тараған.
ІІМ аталған жайтқа қатысты ресми түсініктеме берді.
«00:00-ден кейін рұқсат етілген жылдамдық 66 км/сағ болатыны» жөнінде таралып жатқан хабарлама фейк. Мұндай өзгерістер енгізілген жоқ. Елді мекендерде жеңіл автокөліктер үшін рұқсат етілген стандартты жылдамдық — 60 км/сағат. Камералар жылдамдықты 70 км/сағ және одан жоғары болған кезде ғана тіркей бастайды. Тексерілмеген хабарламаларға сенбеңіздер, ресми ақпаратқа жүгініңіздер. Жол жүрісі қағидаларын сақтап, мұқият болыңыздар», — деп жазылған хабарламада.
