БАҚ-тағы шу мен құжаттағы сәйкессіздіктерден соң сот Ертаевқа амнистия беруден бас тартты
Иллюстрация: nofake.kz/
Алматы облыстық соты экс-банкир Жомарт Ертаевқа амнистия беру туралы қаулыны не үшін жойғанын түсіндірді, деп хабарлайды nofake.kz/.
Алматы облыстық сотының баспасөз қызметі хабарлағандай, бұған дейін 2025 жылғы 2 қыркүйектегі Алатау қалалық сотының қаулысымен Ертаевтың өтініші қанағаттандырылып, ҚР Конституциясының 30 жылдығына орай жарияланған амнистияға сәйкес 11 ай 16 күн өтелмеген жазадан босатылған болатын.
Ертаев екі үкім бойынша сотталған: 2020 жылғы 16 қарашадағы және 2021 жылғы 3 наурыздағы үкімдер.
«Алматы қаласының Алмалы аудандық сотының 2021 жылғы 25 маусымдағы қаулысымен осы үкімдердің жиынтығы бойынша түпкілікті жаза мерзімі шешілген. Алайда сот қаулысында бірінші үкім бойынша өтелген жазаны есептеу мәселесі шешілмеген. Сондай-ақ жазаның қай үкімнен бастап есептелетіні көрсетілмеген. Алатау қалалық сотының қаулысындағы өтелмеген жаза мерзімі мен №14 мекеменің анықтамасындағы мерзім арасында алшақтық бар, сонымен бірге анықтаманың өзі мекеме басшысымен қол қойылмаған», — делінген сот хабарламасында.
Істі зерделеген сот алқасы амнистия актісін қолдануға негіз жоқ деген қорытындыға келді.
«Көрсетілген мән-жайларды ескере отырып, Ертаевты босату туралы сот қаулысы жойылды, ал оның өтініші қанағаттандырылмады», — деп атап өтті сот.
Еске сала кетейік, Жомарт Ертаевтың есімі банктік сектордағы ұрлық деректеріне қатысты бірнеше рет аталған. Сондай-ақ ол қаржылық алаяқтықтарды тергеумен байланысты болды. 2011 жылы экс-банкир Жомарт Ертаев Қазақстанда алаяқтық үшін сотталып, кейін шартты түрде мерзімінен бұрын босатылған. 2018 жылы Ертаев Қазақстан тарапынан сұрау салынғаннан кейін Мәскеуде ұсталып, отанына экстрадицияланды. 2020 және 2021 жылдары қазақстандық соттар оны аса ірі көлемде ұрлық және қаржы саласындағы өзге де қылмыстар үшін кінәлі деп танып, үкімдердің жиынтығы бойынша ұзақ мерзімге бас бостандығынан айыру жазасын тағайындаған.
