Сәтбаевта зейнеткер интернет-алаяқтардың құрбаны болды
Фото: freepik.com
Сәтбаев қаласында WhatsApp мессенджері арқылы жасалған интернет-алаяқтық фактісі тіркелді, деп хабарлады Polisia.kz.
Құқық қорғау органдарының мәліметінше, белгісіз адам өзін байланыс қызметінің қызметкері ретінде таныстырып, зейнеткер әйелді телефон мен интернетке қатысты келісімшартты ұзарту қажет екеніне сендірген.
«Жеңілдік картасын» рәсімдеу сылтауымен қаскөй әйелдің жеке деректерін алып, оның ұялы телефонына қашықтан қол жеткізген. Осыдан кейін мобильді банкинг қосымшалары арқылы оның банк шоттарынан ақша аударымдары жасалған. Қылмыстық әрекеттердің салдарынан жәбірленушінің екі шотынан заңсыз түрде 1,8 миллион теңгеден астам қаражат ұрланған», — деп хабарлады полиция.
Алаяқтық фактісі бойынша жедел-іздестіру және тергеу шаралары жүргізілуде, күмәнді транзакциялар туралы ақпарат антифрод жүйесіне енгізілді.
