Луврдағы ұрлық: жоғалған жәдігерлер санына қатысты мәліметтер бұрмаланған
Коллаж: nofake.kz/
Әлемдік ақпарат құралдарының назарын аударған Лувр музейіндегі ұрлық туралы түрлі басылымдарда шындыққа жанаспайтын және тексерілмеген деректер тарап жатыр. 2025 жылдың 19 қазанында орын алған “Ғасыр ұрлығы” аталған оқиға жайлы кейбір ақпарат көздері жалған мәлімет таратқан. nofake.kz/ тілшісі олардың бірқатарын тексеріп, шынайы деректерді анықтады.
Кей БАҚ материалдарында Луврдан тоғыз құнды жәдігердің жоғалғаны туралы хабарланған. Алайда Францияның Мәдениет министрлігі таратқан ресми ақпаратта “Аполлон” галереясындағы сөрелерден сегіз әшекей бұйымның жоғалғаны айтылған. Ұрлық бар болғаны бірнеше минутта жасалған. Алғашқы хабарламаларда әртүрлі мәліметтер берілгенімен, соңғы ресми дерек бойынша жоғалған жәдігерлердің нақты саны – сегіз.
Сондай-ақ бірқатар басылымдарда Евгения патшайымның (Наполеон III-тің жұбайы) тәжі жоғалған немесе бүлінгені туралы ақпарат тарады. Кейін кей дереккөздер тәждің бүлінген күйінде табылғанын хабарлаған. Бұл да шындыққа сәйкес келмейді. Францияның Мәдениет министрлігі мәлімдегендей, Евгения патшайымның тәжі өз орнында, “Аполлон” галереясында сақтаулы тұр. Тәждің жоғалғаны жөніндегі қауесет сөрелерде қалған әшекей бұйым сынықтарын қате түсіндіруден туған.
Осылайша, Лувр музейіндегі “Ғасыр ұрлығы” жөнінде тараған кейбір мәліметтер шындыққа жанаспайды. Ұрланған жәдігерлердің саны тоғыз емес сегіз, ал Евгения патшайымның тәжі ұрланбаған. Франция билігі БАҚ өкілдерін тек ресми дереккөздерге сүйенуге және тексерілмеген ақпарат таратпауға шақырды.
Айта кетейік, оқиғадан зардап шеккендер жоқ. Қазір Францияның Ішкі істер министрлігі қылмыстық іске қатысты тергеу жүргізіп жатыр.
