«Дропперлік» әрекет: Алматы облысында жаңа бап бойынша тергеу басталды
Фото: depositphotos
Алматы облысының прокуратурасы «дропперлік» әрекеті үшін жаңа 232-1-бап бойынша алғаш рет сотқа дейінгі тергеп-тексеруді бастады, деп хабарлайды nofake.kz/.
«Тексеру барысында Еңбекшіқазақ ауданының тұрғынының алаяқтарға ұрланған қаражатты аударуға делдал болғаны белгілі болды. Әйел адам OLX сайтындағы “онлайн-төлемдер операторы” туралы жалған хабарландыруға алданып, өз банк картасын қылмыскерлерге пайдалануға берген. Қыркүйек айынан бастап оның шотына 2 миллион теңгеден астам қаражат түскен. Оның 5 пайызын әйел «комиссия» ретінде қалдырып отырған. Қалған қаражат алаяқтардың есепшоттарына аударылған», — делінген прокуратураның хабарламасында.
Прокуратураның дерегі бойынша, бұл – алаяқтар жиі қолданатын схема. Олар ұрланған ақшаны қолма-қол ету үшін өз шоттарын пайдалануға дайын адамдарды іздейді.
«Заң мұндай «дропперлерге» де, олардың іс әрекеттерін ұйымдастыратындарға да қатаң жаза белгілейді. Қазіргі уақытта Еңбекшіқазақ ауданының полиция басқармасымен барлық қажетті тергеу әрекеттері жүргізіліп жатыр. 2025 жылғы 16 қыркүйектен бастап «дропперлік» әрекет қылмыстық жауаптылыққа жатады. Жауапкершілікке тек өз реквизиттерін бөтен адамдарға беретіндер ғана емес, сондай-ақ өзгенің банк карталарын сатып алатын немесе пайдаланатын адамдар да тартылады», — деді Бас прокуратура хабарламасында.
«Дропперлік» әрекет, яғни басқа тұлғалардың шоттарын қылмыстық мақсатта басқару үшін 7 жылға дейін бас бостандығынан айыру түріндегі қылмыстық жауаптылықтың қарастырылған. Банктік карталарыңызды, ПИН-кодтарыңызды, логиндеріңіз бен құпиясөздеріңізді бөгде адамдарға бермеңіз және күмәнді интернет ресурстарға жеке деректеріңізді енгізбеңіз.
