Coldplay концерті: «Кiss Cam» жанжалы және одан тараған жалған ақпараттар
2025 жылғы 16 шілде күні АҚШ-тың Массачусетс штатындағы Foxborough қаласында өткен Coldplay концерті кезінде «kiss cam» камерасы көрермендер арасындағы ер адам мен әйелді экранға шығарды. Көрініс әлеуметтік желілерде тез тарап, түрлі айыптаулар мен жалған мәлімдемелерге ұласты. Жалған ақпарат қалай тарады, nofake.kz/ түсіндіреді.
Оқиғаның басы
2025 жылғы 16 шілде күні АҚШ-тың Массачусетс штатындағы Foxborough қаласында өткен Coldplay концерті кезінде «kiss cam» камерасы көрермендер арасындағы ер адам мен әйелді экранға шығарды. Ер адам әйелге жақындаған кезде, әйел ыңғайсызданып, бетін жауып қалды. Көрініс жұрттың назарына түсіп, видео әлеуметтік желілерде тез тарап кетті.
Интернет қолданушылары видеодағы адамдарды Andy Byron (Astronomer компаниясының бас директоры) мен Kristin Cabot (HR басқарушысы) деп танып, оқиға үлкен дау тудырды.
Компанияның реакциясы
Astronomer компаниясы жанжалдан кейін тексеру жүргізіп, екі басшыны уақытша қызметінен шеттетті. Бұл шешім қоғамдағы қысым мен компания имиджін қорғау мақсатында қабылданғаны айтылды.
Жалған ақпараттар қалай тарады
«Кешірім хат». Желіде Andy Byron атынан «Coldplay кінәлі, мен кешірім сұраймын» деген мәтін тарады. Кейбіреулер мұны ресми мәлімдеме деп қабылдады.
Фактчек: Компания мұндай хабарламаны жоққа шығарды. Бұл пародиялық аккаунттан тараған жалған хат болып шықты.
Қызметкерлерді қате сәйкестендіру
Видеодағы әйелді басқа қызметкер, Alyssa Stoddard деп атаған посттар тарады.
Фактчек: Ол концертте болмаған. Бұл да әлеуметтік желідегі қате сәйкестендіру.
Coldplay-дің ресми шешімі
Әлеуметтік желілерде «Coldplay енді концерттерінде kiss cam қолданбайды» деген хабарламалар шықты.
Фактчек: Бұл ақпарат та жалған. Coldplay тарапынан ресми мәлімдеме жасалған жоқ.
Неліктен бұл резонанс тудырды?
- Танымал тұлғалар: Әңгіме қарапайым көрермен емес, халықаралық IT компаниясының басшылары туралы болды.
- Визуалды дәлел: Видео нақты, шынайы болғандықтан, аудиторияға сенімді көрінді.
- Жалған ақпараттың жылдамдығы: Әлеуметтік желілердегі мемдер мен жалған хаттар ақпараттың анық-қанығын білмей тұрып тез тарады.
Түйін: Coldplay концерті кезінде болған «kiss cam» сәті – шын оқиға. Бірақ оның айналасында тараған көптеген «кешірім хаттары», «ресми мәлімдемелер» және «басқа адамдардың қатысы» туралы хабарламалар – жалған.
Бұл жағдай ақпараттық кеңістікте бір ғана сәттің қалайша алып резонансқа айналып, жалған ақпараттың қаншалықты тез тарайтынын көрсетті.
