Астанада кәсіпкер әйел дропперлік іс бойынша күдікті атанды
Фото:
Жеке кәсіпкер банк шотын алаяқтарға бергені үшін қылмыстық істің фигурантына айналды, деп хабарлады Астана қалалық Полиция департаменті.
Құқық қорғау органдарының мәліметінше, Есіл ауданы полиция бөлімінің қызметкерлері дропперлік фактісі бойынша — яғни банк шотын алаяқтық операциялар үшін заңсыз пайдалану дерегімен қылмыстық істі тергеп жатыр. Анықталғандай, 2025 жылы өңір тұрғыны интернет-дүкен арқылы квадроцикл сатып алу үшін 680 мың теңге аударған, алайда төлемнен кейін «сатушы» байланысқа шықпай қойған. Жәбірленуші полицияға жүгінген.
«Жедел-іздестіру шаралары барысында полиция қызметкерлері ақша аударылған шоттың иесін анықтады. Ол Астанада тұратын, жеке кәсіпкер ретінде тіркелген азық-түлік дүкенінің иесі болып шықты. Күдіктінің айтуынша, бұған дейін оған белгісіз бір ер адам келіп, сыйақы үшін өз банк шотын ақша аударуға пайдалануды ұсынған. Мүмкін салдарын ескермей, әйел бұл ұсынысқа келіскен», — деп хабарлады полиция.
Ведомство мәліметінше, ақша түскеннен кейін әйел белгілі бір пайызын өзіне қалдырып, қаражатты қолма-қол шешіп, үшінші тұлғаға берген. Аталған дерек бойынша кәсіпкер әйелге қатысты ҚР Қылмыстық кодексінің 232-1-бабы бойынша қылмыстық іс қозғалды. Сотқа дейінгі тергеу жалғасып жатыр.
