Астанада фельдшерге шабуыл: құзырлы органдар жауап берді
Фото: depositphotos
Астанада психикалық денсаулық орталығында медицина қызметкеріне шабуыл жасалған оқиғаға қатысты қалалық денсаулық сақтау басқармасы түсініктеме берді, деп хабарлайды NoFake.kz.
«Медицина қызметкеріне қызметтік міндетін атқару кезінде күш қолдану фактісі бойынша ҚР ҚК-нің 380-3-бабымен қылмыстық іс қозғалды. Күдікті ұсталды, оған қатысты бұлтартпау шарасын таңдау мәселесі қаралып жатыр», — деп хабарлады қалалық денсаулық сақтау басқармасы.
Зардап шеккен фельдшер Асылхан Амангелдіұлы бет тұсынан соққы алып, мойын жарақатын алған. Дәрігерлер оған бас-ми жарақаты мен жұмсақ тіндердің соғылуы диагнозын қойған.
Оқиға контексті
3 сәуір күні қалалық психикалық денсаулық орталығында келушілердің бірі фельдшерге қол көтерген. Алдын ала мәлімет бойынша, 47 жастағы ер адам туысын көру үшін қабылдау бөліміне келген. Кезекші фельдшер одан жеке деректерін ұсынуды және белгіленген қабылдау уақытында келуін сұраған. Алайда ер адам талап орындалмаған соң агрессия танытып, медицина қызметкерін ұрып, оқиға орнынан қашып кеткен.
Өз кезегінде полиция мұндай әрекеттер үшін қатаң жауапкершілік қарастырылғанын ескертті.
«Жедел қызмет қызметкерлеріне қатысты кез келген агрессия немесе қорқыту әрекеттері заң бойынша жауапкершілікке әкеледі», — деп мәлімдеді Астана қаласының Полиция департаменті.
Айта кетейік, бұған дейін фельдшер орталықта қауіпсіздік шаралары жеткіліксіз екенін, дабыл батырмасының жоқтығын айтқан.
