Астана аспанындағы дрондар — полиция департаменті түсініктеме берді
Фото: polisia.kz
Астана тұрғындары соңғы күндері қала үстінен ұшып жүрген дрондарға назар аудара бастады. Полиция өкілдері пилотсыз құрылғылардың қандай мақсатта қолданылатынын, олардың камералары қалай жұмыс істейтінін және осы уақытқа дейін қандай құқық бұзушылықтар анықталғанын түсіндірді, деп хабарлайды nofake.kz/.
«Қаланың қауіпсіздігін қамтамасыз ету жұмысы полицияның оперативтік басқару орталығында ұйымдастырылған. Мұнда қаладағы жағдай тәулік бойы, яғни 24/7 бақыланады. Мониторингке көшелердегі видеокамералар, смарт-жетондар, автопатрульдерге орнатылған камералар, сондай-ақ ұшу аппараттары (дрондар) тартылған. Күн сайын дрондар көлік ағындарын қадағалап, жол қозғалысы ережелерін бұзуды тіркейді, сондай-ақ мемлекеттік нөмірлерді таниды және деректерді іздеу базасымен салыстырады. Олар құқық қорғау органдарына болып жатқан оқиғаларға жедел әрекет етуге мүмкіндік береді», — деді жауапты мекеме.
Сонымен қатар, дрондарға орнатылған дауыс көтергіш құралдары арқылы полиция қызметкерлері азаматтарға хабарлама жіберіп, құқықбұзушылықтар туралы ескертеді. Қоғамдық тәртіпті сақтауға шақырады және профилактикалық жұмыстар жүргізе алады.
«Дрондар қоғамдық тәртіпті бұзу деректерін де тіркейді. Мысалы, қалалық зиратта 44 жастағы ер адам белгіленбеген жерде қоқыс тастаған, қоғамдық жерді ластаған. Басқа бір оқиғада Гёте көшесінде жас жігіт темекі шегіп, күлді жерге тастаған. Екі жағдайда да құқық бұзушыларға қатысты әкімшілік хаттамалар «кішігірім хулигандық» бабына сәйкес рәсімделді», — деп түсіндірді ведомство өкілдері.
