Ақорда 7 трлн теңге көлеміндегі транзакцияларға қатысты пікір білдірді
Фото: Depositphotos
Президенттің баспасөз хатшысы Айбек Смадияр 7 трлн теңге көлеміндегі транзакциялар туралы ақпараттың расталғанын, алайда ол қызметтік сипатта болғанын мәлімдеді, деп хабарлайды NoFake.kz.
Оның айтуынша, бұл ақпарат Қаржы мониторингі агенттігі ғимаратында өткен кеңесте айтылған және кең көлемде жария етілмек болмаған. Операцияға қатысқан нақты тараптар мен қаржы ұйымы дипломатиялық хаттама мен саяси мақсаттылық себептерінен ашық айтылмаған.
«Мемлекет басшысы Қасым-Жомарт Тоқаев тексерілмеген ақпаратты жарияламайды. Егер ол 7 трлн теңге сомасына транзакциялар болғанын айтқан болса, демек солай болды. Бірақ бұл ақпарат тек Қаржы мониторингі агенттігі ғимаратында өткен кеңестің қатысушыларына арналған, яғни ол тек қызметтік сипатта болған. Транзакциялар жүзеге асқан банк кімдер туралы айтылғанын біледі. Президент саяси мақсаттылық пен дипломатиялық протоколды ескере отырып, транзакциялық қаражаттың шыққан елін, қабылдаушы елді және санкциялық режим жағдайында мұндай функцияны атқарған банкті атаған жоқ», — деді Айбек Смадияр.
Еске сала кетейік, 28 қаңтарда Қасым-Жомарт Тоқаев Қазақстан банктерінің бірі көрші елден 7 трлн теңге (шамамен 14 млрд АҚШ доллары) аударуға көмектескенін мәлімдеген еді. Мемлекет басшысы мұндай операцияларға жол бермеу қажеттігін атап өтіп, қаржылық алаяқтық схемаларының әлі де анықталып жатқанын мәлім етті.
